DC PANGANI ASHIRIKI KIKAO CHA KAMATI YA AFYA YA MSINGI KUHUSU KAMPENI YA KITAIFA YA CHANJO YA SURUA NA RUBELLA.

siku ya kuwekwa : February 14th, 2024

DC PANGANI ASHIRIKI KIKAO CHA KAMATI YA AFYA YA MSINGI  KUHUSU KAMPENI YA KITAIFA YA CHANJO YA SURUA NA RUBELLA

Mkuu wa Wilaya ya Pangani mhe Zainab Abdallah ameshiriki kikao maalumu cha Kamati ya Afya ya Msingi kuhusu kampeni ya Kitaifa ya Chanjo ya Surua na Rubella.

Kikao hicho kimefanyika leo tarehe 14 Februari 2024, katika ukumbi wa Halmashauri ya Zamani Wilayani Pangani.

Akiwasilisha taarifa ya Kampeni hiyo ya Kitaifa yenye kauli mbiu "Onyesha Upendo, Mpeleke Mtoto Akapate Chanjo"   Mratibu wa Chanjo kutoka Ofisi ya Mganga Mkuu wa Wilaya ndg Timothy Mgaya amesema kuwa ni lazima Watoto wapate chanjo hiyo ili kujikinga na Magonjwa hayo.

Ameongeza kuwa ugonjwa wa Surua unaambukizwa kwa njia ya hewa  na ameeleza dalili za ugonjwa huo ikiwemo homa ,mafua kikohozi, na macho kuwa mekundu na kutoa majimaji.

Vilevile ameelezea kuwa Rubella ni ugonjwa unaosababishwa na virus vya Rubella na ukimpata mama mjamzito unaweza kuleta madhara kwa mtoto ikiwemo mtoto wa jicho, pamoja na matatizo ya moyo.

Ameendelea kueleza kuwa kinga ya kujikinga na ugonjwa huu ni pamoja na kupata kinga ya  sindano mbili za kutibu dalili na madhara ya magonjwa hayo.

Wilaya ya Pangani inategemea kuchanja Watoto 7676 kwa Chanjo ya Surua na Rubella kuanzia tarehe 15 hadi 19 Februari 2024, na kila kituo kishapatiwa walengwa wa kuchanja chanjo ya Surua na Rubella na hutolewa bure katika kila kituo cha Afya.

Kikao hicho kimehudhuriwa na wataalam kutoka Ofisi ya Rais Tamisemi, Muwakilishi wa Ofisi ya Mganga Mkuu Mkoa  na Wakuu wa idara na Vetengo wa Halmashauri ya Wilaya ya Pangani