KONGWA DC YAFANYA ZIARA YA MAFUNZO PANGANI.

siku ya kuwekwa : December 13th, 2024

Waheshimiwa Madiwani pamoja na Watumishi kutoka Halmashauri ya Wilaya ya Kongwa , leo tarehe 13 Desemba, 2024 wamefanya ziara ya mafunzo Wilayani Pangani, lengo likiwa ni kujifunza namna gani ya uzalishaji wa maziwa kwa wafugaji pamoja na kudumisha mahusiano kati ya Halmashauri hizo mbili.

Wakiwa kwenye ziara hiyo, Waheshimiwa Madiwani na Watumishi wa Halmashauri ya Wilaya ya Kongwa walipata fursa ya kutembelea kituo cha Ushirika wa Wafugaji wadogo wadogo wa Ngo'mbe wa Maziwa Pangani ( WAWAPA) na kujifunza mambo mbalimbali ikiwemo njia zinazotumiwa katika uzalishaji wa maziwa kwa wafugaji wadogo wadogo.

Akiwasilisha taarifa ya chama cha Wafugaji wadogo wadogo wa Ngo'mbe wa Maziwa Pangani, katibu wa chama hicho ndg Shamnte Said amesema kuwa _:

" Umoja huu umejikita katika ukusanyaji  na usafirishaji wa maziwa kutoka Pangani na kupeleka kiwandani Tanga, ambapo mwezi Novemba jumla ya Lita  elfu 70, zilipelekwa na kuuzwa  kiwandani Tanga, na Lita 1700 zilitumika Wilayani Pangani" alisema.

Kwa upande wake mkuu wa Wilaya ya Kongwa Mhe Mayeka S Mayeka ametoa pongezi zake kwa

uongozi wote wa Halmashauri ya Wilaya ya Pangani, kwa mapokezi mazuri na kushauri kuwa ufugaji unapaswa kuanzishwa na maafisa wenyewe ili kutoa fursa kwa wananchi kujifunza kwa vitendo kupitia maafisa hao.

" Mimi nimesomeshwa na Ng'ombe hivyo ni wakati wa kuongeza maarifa kidogo katika ufugaji ili na sisi tufanikiwe, tunawakaribisha sana Kongwa". Alisema.

Sambamba na hilo ,Mhe Job Ndugai mbunge wa jimbo la Kongwa, ametumia fursa hiyo  kumpongeza mbunge wa jimbo la Pangani mhe Jumaa Aweso kwa kuwa mlezi bora wa kikundi hicho.