UZINDUZI KAMPENI YA KUDHIBITI MAGONJWA YALIYOKUWA HAYAPEWI KIPAUMBELE

siku ya kuwekwa : February 7th, 2025

UZINDUZI WA KAMPENI YA   KUDHIBITI MAGONJWA YALIYOKUWA HAYAPEWI KIPAUMBELE

Halmashauri ya Wilaya ya Pangani imedhamiria kuendeleza mikakati dhabiti ya kuwakinga wananchi na magonjwa yaliyokuwa hayapewi kipaumbele.

Hayo yamesemwa leo tarehe 07/02/2025 katika kikao cha kimkakati cha umezeshaji dawa kinga za Minyoo Tumbo,Kichocho na Matende na Mabusha[Ngirimaji] kilichoongozwa na  Mkuu wa Wilaya Mhe Gift Msuya kwenye ukumbi wa ofisi ya Mkuu wa Wilaya.

Mratibu wa Magonjwa yaliyokuwa Hayapewi Kipaumbele (NTD) Wilaya ya Pangani, Dkt. Jumanne Akilimali, alianza kwa kubainisha  magonjwa hayo ambayo yalikuwa hayapewi kipaumbele wilaya ya Pangani ambayo ni pamoja na Kichocho,Minyoo Tumbo na Matende na Mabusha [Ngirimaji].

Pia,Dkt.Akilimali  ameongeza kuwa,  ili kukabiliana na tatizo hilo Idara ya Afya  Pangani kwa kushirikiana na wizara ya Afya itaendesha zoezi la utoaji wa Dawa   kingatiba kwa watoto wa umri  kuanzia miaka 5 hadi miaka 14 wa shule  zote ambapo zoezi hilo litaanza siku ya  tarehe 17-18/02/2025 na kingatiba ya Matende na Mabusha [Ngirimaji] kuanzia Tarehe 21-28/02/2025 kwa wanachi wote wenye miaka 5 na kuendelea.

Aidha,aliongeza kuwa zoezi hilo litasimamiwa na walimu wakishirikiana na watumishi wa Afya  na lengo ni kuwafikia wanafunzi pamoja na wananchi wote kiujumla.Hii itasaidia kuondokana na changamoto za zilizokithiri za udumavu, utapiamlo  na upungufu wa damu kwa watoto na uwepo wa matende na Mabusha [Ngirimaji] kwa watu wazima.

Wizara ya Afya kupitia mpango wa Taifa wa kudhibiti magonjwa yaliyokuwa hayapewi kipaumbele  imekua ikiiendesha mazoezi haya kwa miaka sasa ili kutokomeza matatizo haya sugu katika jamii ya Pangani hivyo kila mwananchi anaaswa kushiriki kumeza dawa kinga  ili kutokomeza Kichocho,Matende na Mabusha[Ngirimaji]