WATUMISHI WALIOTEULIWA KUANDIKISHA ORODHA YA WAPIGA KURA WAPEWA MAFUNZO.

siku ya kuwekwa : October 7th, 2024

WATUMISHI WALIOTEULIWA KUANDIKISHA ORODHA YA WAPIGA KURA WAPEWA MAFUNZO.

Pangani_ Tanga.

Leo Oktoba 07 ,2024 watumishi wa umma pamoja na wasaidizi wa Uchaguzi wa Serikali za Mitaa 2024, ngazi ya kata na Vijiji, wamepatiwa mafunzo ya Kanuni za uchaguzi wa Serikali za Mitaa 2024, kutoka kwa  waratibu wa uchaguzi ngazi ya Wilaya.

Hayo yamefanyika katika ukumbi wa Ymca Mkoma, ambapo Mratibu wa uchaguzi ngazi ya Wilaya Wakili Msomi ndg Agape Fue, amebainisha kanuni zitakazoongoza uchaguzi wa Serikali za Mitaa unaotarajiwa kufanyika Novemba 27, 2024.

" Uchaguzi huu utaongozwa na Kanuni zifuatazo, Kanuni za uchaguzi wa Mwenyekiti wa Kijiji, Wajumbe wa Halmashauri ya Kijiji na Mwenyekiti wa Kitongoji, katika Mamalaka za Wilaya ( Tangazo la Serikali na. 571 la Mwaka 2024)". Alifafanua.

Akiwasilisha mada ya kanuni zitakazo ongoza uchaguzi huo,  ndg Adv Agape Fue amewataka wasimamizi hao kutoa hamasa kwa wakazi wenye umri wa miaka ishirini na moja au zaidi wanaotaka kugombea nafasi ya uenyekiti wa Kijiji, Ujumbe wa Halmashauri ya Kijiji, au Uenyekiti wa Kitongoji  kuchukua fomu za kugombea zinazopatikana kwenye ofisi ya Msimamizi Msaidizi wa Uchaguzi.

Sambamba na hilo amewataka waandikishaji wa Wapiga Kura kuzingatia sheria na kanuni wakati wa zoezi la Uandikishaji.

" Kanuni ya 11 uandikishaji na uaandaji wa orodha ya Wapiga Kura, utaanza siku 47 kabla ya Siku ya Uchaguzi, na uandikishaji Utafanyika kwa muda wa siku 10". Alifafanua.

Mada nyingine zilizo wasilishwa na waratibu wa uchaguzi ngazi ya Wilaya ni pamoja na matumizi ya fomu mbalimbali za Uchaguzi wa Serikali za Mitaa 2024, maadili ya Utumishi wa umma kwa watumishi wanaohusika katika Uchaguzi wa Serikali za Mitaa 2024, upokeaji na utunzaji wa vifaa vya uchaguzi wa Serikali za Mitaa 2024, tehama,uhamasishaji wa Wananchi kushiriki shughuli zote za uchaguzi wa Serikali za Mitaa 2024, kuhabarisha unma juu ya masuala ya Uchaguzi wa Serikali za Mitaa pamoja na uandaaji wa Taarifa za uchaguzi.