TFCG YATAMBULISHA MRADI WA SULUHISHO LA UJUMUISHWAJI WA MISITU NA NISHATI ENDELEVU YA TUNGAMOTAKA TANZANIA .

siku ya kuwekwa : March 13th, 2024

Shirika la Kuhifadhi Misitu ya Asili Tanzania (TFCG), leo tarehe 13, Machi 2024, limetambulisha Mradi wa Suluhisho la Ujumuishwaji wa Misitu na Nishati Tanzania, Wilayani Pangani.

Hayo yamefanyika katika ukumbi wa zamani wa Halmashauri ya Wilaya ya Pangani na kuhudhuriwa na Katibu Tawala Wilaya Bi Ester Gama, Mwenyekiti wa Halmashauri Akida Bahorera,Makamu Mwenyekiti mhe Zainab Mvaa,Katibu wa CCM Wilaya ya Pangangi Bw Abdul Swala, Kaimu Mkurugenzi Mtendaji, Wakuu wa idara na Vitengo pamoja na Waheshimiwa Madiwani.

Akifungua kikao hicho Katibu Tawala Wilaya ya Pangani Bi Ester Gama amelipongeza Shirika la Kuhifadhi Misitu ya Asili Tanzania kwa kutoa Elimu na kuhimiza kuwa  utunzaji wa misitu uwe endelevu kwa wananchi ili kuendelea kuhifadhi Misitu ya Asili Tanzania.

Akiwasilisha Taarifa ya mradi huo  Mkurugenzi Mtendaji wa Shirika la TFCG ndg Charles Meshack amesema kuwa mradi huu ni wa miaka mitatu (3), na unafaida nyingi kwenye vijiji ikiwemo kukabiliana na mabadiliko ya tabia nchi.

Kwa upande wake  meneja wa mradi Ndg Saimon amesema kuwa lengo kuu ni kuimarisha usimamizi endelevu wa mazingira na misitu, na mradi huu unatarajiwa kufanyika katika vijiji vitatu hapa Pangani ambavyo ni Mseko,Mtango na Kwakibuyu.

Bw. Saimon amesisitiza kuwa mradi huu utalenga kutoa elimu kwa maafisa misitu na Wataalam kuhusu usimamizi wa Misitu ya jamii,utawala bora na uvunaji endelevu wa Misitu.

Waheshimiwa Madiwani walipata nafasi ya kutoa maoni mbalimbali kuhusu mradi huo ambapo wameupokea mradi huo na kupongeza kwa elimu iliyotolewa yenye lengo la  kuwainua Wananchi kiuchumi.