IFBEST WALETA SULUHISHO LA UHARIBIFU WA MISITU NA KUBORESHA MAZINGIRA.

siku ya kuwekwa : September 3rd, 2024

Mkuu wa Wilaya ya Pangani, Mhe. Gift Isaya Msuya, ameshiriki Mkutano wa Wadau wa Mradi wa Kuleta Suluhisho la Ujumuishaji wa Misitu na Nishati (IFBEST), uliofanyika tarehe 3 Septemba 2024.

Mkutano huu uliwaleta pamoja wadau mbalimbali kutoka sekta za umma na binafsi, wakiwemo wataalamu wa misitu, nishati, na maendeleo endelevu, ili kujadili na kuweka mikakati ya kulinda na kuboresha mazingira kupitia matumizi endelevu ya misitu na nishati.

Mhe. Msuya alisisitiza umuhimu wa mradi huu kwa Wilaya ya Pangani, akisema kwamba utekelezaji wake utasaidia kuleta maendeleo ya kijamii na kiuchumi kwa wananchi, sambamba na kulinda rasilimali za misitu na nishati. Mradi wa IFBEST unalenga kutoa suluhisho la kijumuishi kwa changamoto za uharibifu wa misitu na upatikanaji wa nishati endelevu, kwa kushirikiana na jamii za eneo hilo ili kuhakikisha matumizi bora ya rasilimali hizi.

Wilaya ya Pangani ni miongoni mwa maeneo yaliyoteuliwa kufaidika na mradi huu, kutokana na umuhimu wake wa kijiografia na kiuchumi katika mkoa wa Tanga. Mkutano huu unatarajiwa kuleta mwamko mpya kwa wadau kuhusu njia bora za kudhibiti uharibifu wa mazingira na kuhakikisha upatikanaji wa nishati salama na endelevu kwa vizazi vijavyo.